Asamblisti i VV-së në Komunën e Podujevës, Vendenis Lahu ka njoftuar se në mbledhjen e ardhshme të Asamblesë Komunale do të japë dorëheqjen e tij nga ky post, përcjell InLajmi.
Ai thekson se shkak i këtij vendimi është zgjedhja e motrës së tij, Marigona Lahut, në postin e nënkryetares së komunës.
Lahu thotë se edhe pse kjo nuk përbën konflikt interesi, pasi përzgjedhja e tij ka ardhur nga vota e popullit, megjithatë, ai thekson se po mundohet të japë shembull se “posita nuk është gjithçka”
Postimi i plotë i tij:
“Të dashur aktivistë të Lëvizjes Vetëvendosje!
Të respektuar anëtarë e simpatizantë të Lëvizjes Vetëvendosje!
Të nderuar qytetarë të Besianës
Rezultati i 29 nëntorit solli ndryshim në qeverisjen komunale – ndryshim ky për të cilin pandalshëm punuan aktivistët e qytetarët e pakënaqur me qeverisjen e deritashme.
Siç edhe mund ta keni parë shumë nga ju, në ekzekutivin e ri të komunës, të emëruar nga kryetari Bulliqi dhe Lëvizja Vetëvendosje!, në pozitën e nënkryetares së Komunës është emëruar anëtarja e hershme e Lëvizjes, motra ime, Marigona. Duke e pasur të njohur mirë ndarjen e qartë mes pushtetit ekzekutiv dhe legjislativit, jam i vetëdijshëm se pozicioni im në legjislativ, si asamblist i dalë nga vota qytetare, nuk paraqet konflikt interesi por, në të njëjtën kohë, duke dashur të jap shembull personal se pozicionet nuk janë gjithcka dhe se e përgjithshmja është çdo herë mbi personalen, ju njoftoj se në mbledhjen e ardhshme të Asamblesë Komunale do të paraqes tërheqjen time nga Asambleja dhe njëkohësisht pozicioni i Shefit të Grupit të Asamblistëve të VV-së, duke u dhënë kështu mundësi edhe të tjerëve për të punuar në realizimin e synimeve tona të përbashkëta.
Të nderuar qytetarë, pozitat udhëheqëse nuk janë për përfitime vetanake, ato janë përgjegjësi e jashtëzakonshme për të gjithë ata që e kuptojnë peshën e përgjegjësisë së detyrës të cilën e ushtrojnë, dhe nder e privilegj për ata të cilët arrijnë të jetësojnë vizionin e tyre për të mirën e përbashkët.
Asamblistëve të rinj u uroj punë të mbarë, e ekzekutivit te ri suksese!
Aktivizmi im nuk do të ndalet, ai do të vazhdojë në dimensione tjera”./InLajmi/
