Ministria e Shëndetësisë së Shqipërisë ka publikuar të dhënat e fundit mbi pandeminë e Covid-19. Gjatë 24 orëve të fundit kanë humbur jetën 12 qytetarë, ndërsa nga 2604 testime të kryera, 802 prej tyre janë konfirmuar pozitivë.
Autoritetet bëjnë të ditur se numri i të shtruarve në spitale është i qëndrueshëm. Aktualisht në katër spitalet COVID, po marrin trajtim 451 pacientë, 37 janë në terapi intensive dhe 12 pacientë të tjerë janë të intubuar. Gjithashtu gjatë orëve të fundit janë shëruar 527 qytetarë, duke e çuar numrin e të shëruarve 24.136, që nga fillimi i epidemisë.
Pas konfirmimi të rastit të parë në Shqipëri dhe deri sot janë kryer gjithsej 216.441 teste, ndërkohë numri i të konfirmuarve pozitivë është afro 47 000.
Një tregues tjetër, i cili po shihet me shqetësim nga specialistët e shëndetit është numri i rasteve aktive.
Bazuar në buletin ditor të MSH-së, thuhet se numri i rasteve aktive është 21.750, kurse numri i jetëve të humbura nga Covid-19 ka shkuar në 977, shkruan Euronews.
Autoritetet u bëjnë thirrje qytetarëve të shmangin grumbullimet masive, të respektojnë masat anti-covid si dhe të zbatojnë më përpikëri masat kufizuese.
