Ka ndërruar jetë Shaban Demiri trajneri dhe gjyqtari i hendbollit. Me këtë rast Ministrja e Kulturës, Rinisë dhe Sportit, Vlora Dumoshi ka shprehur ngushëllimet e saj duke e vlerësuar Demirin si një njeri të dashur e shumë të vlerësuar në hendbollin e Kosovës, përcjell InLajmi.
E nderuar familja Demiri,
Me pikëllim të thellë e mora lajmin se është ndarë nga jeta i dashuri i juaj, trajneri dhe gjyqtari ynë i hendbollit, Shaban Demiri.
Jo vetëm ju si familje, por ne si Kosovë, humbëm një prej njerëzve më të dashur e më të vlerësuar në hendbollin e Kosovës. Shabani ka qenë lojtar, trajner, gjyqtar e vëzhgues-kontrollues i sportit të hendbollit, duke e dhënë kështu kontributin e tij në këtë sport në të gjitha segmentet e tij, sidomos në vitet e 90ta..
Ministrja Dumoshi tregoi se i ndjeri do të kujtohet për përkushtimin e kontributin që i ka dhënë sportit të hendbollit dhe ikja e tij ka lënë një boshllëk në hendbollin kosovar.
Shaban Demiri, do të kujtohet për përkushtimin dhe kontributin që ka dhënë për sportin e hendbollit sepse ai vazhdimisht ka sjellë energji dhe konkretizim në secilin angazhim të tijin. Ikja e tij nga kjo botë ka lënë një boshllëk të madh në hendbollin e Kosovës.
I lehtë i qoftë dheu i Kosovës.
Ngushëllime familjes, miqve, bashkëpunëtorëve dhe dashamirëve të Shaban Demirit./InLajmi/
