Ministri i Shëndetësisë, Armend Zemaj ka nënshkruar sot aplikimin zyrtar për sigurimin e vaksinës kundër virusit COVID-19, përcjell InLajmi.
Zemaj tha se aplikimin për sigurimin e vaksinës e kanë bërë në aleancën globale GAVI-COVAX dhe se aplikimin për asistencë teknike lidhur me këto vaksina e kanë bërë ditë më parë, përmees ekipit të ekspertëve, të themeluar me qëllim të sigurimit të kësaj vaksine.
Kam nënshkruar sot aplikimin zyrtar për sigurimin e vaksinës kundër COVID-19 në aleancën globale GAVI-COVAX, derisa aplikimin për asistencë teknike lidhur me këto vaksina, e kemi bërë ditë më parë, përmes Ekipit të ekspertëve, të themeluar nga unë me qëllim të sigurimit të kësaj vaksine.Aplikimi zyrtar në GAVI-COVAX nuk do të thotë se Kosova nuk do të shfrytëzojë edhe rrugë të tjera për të siguruar vaksina shtesë, sipas nevojës, përtej shifrës së 20% të vaksinave që do merren falas (apo rreth 360 mijë vaksina) nga COVAX, me që synimi është që të imunizohen kategoritë më të ekspozuara dhe rrezikuara nga COVID-19
Ministri shtoi se synimi i tij dhe i gjithë Ministrisë së Shëndetësisë është që të vaksinohen grupet e popullatës që janë më të ekspozuara ndaj rrezikut për COVID-19, por pa përjashtuar asnjë kategori tjetër.
Synimi ynë është që t’i vaksinojmë të grupet e popullatës që janë më të ekspozuara dhe rrezikuara nga COVID-19, siç janë nëpunësit shëndetësor, të moshuarit dhe personat me sëmundje kronike, personali i shërbimeve të angazhuara në menaxhimin e situatës epidemiologjike lidhur me COVID-19…, por pa e përjashtuar asnjë kategori që duhet të vaksinohet kundër COVID-19, duke përmbushur obligimin ligjor.
Ministria e Shëndetësisë para disa muajve kishte nisur kontakte me GAVI-COVAX për sigurimin e vaksinës për qytetarët e Kosovës.
Të vetëdijshëm se sigurimi i vaksinave përbën një obligim për ruajtjen e shëndetit publik të popullatës, Ministria e Shëndetësisë, qysh para disa muajve kishte vendosur kontakte me GAVI-COVAX, me qëllim që të sigurojmë vaksinën për qytetarët tanë. Për fat të mirë, Kosova është e listuar në mesin e shteteve që 20% të vaksinës kundër COVID-19 do ta marrin falas përmes aleancës globale GAVI-COVAX, derisa pjesën tjetër do ta blejë vet./InLajmi/
