Gjyqtarët e Gjykatës Kushtetuese ditët në vijim do të mblidhen për të diskutuar dhe për të nxjerrë aktgjykimin lidhur me vlefshmërinë e votës së deputetit Etem Arifi, ankesë kjo e parashtruar nga Lëvizja Vetëvendosje, përcjell InLajmi.
Zëdhënësi i Gjykatës, Veton Dula tha se palët edhe sot kanë afat për dorëzim të argumenteve me shkrim që u prezantuan javën e kaluar përmes një seance gjyqësore online.
Dula tha se seanca për shqyrtimin e lëndës do të bëhet pas ditës së sotme dhe për vendimin e gjykatës të gjitha palët do të njoftohen me kohë.
Pas seancës dëgjimore publike mbajtur të mërkurën, më 2 dhjetor 2020, palët e përfshira në rast kanë afat që t’i dorëzojnë argumentet e tyre të prezantuara, në të shkruar, deri sot, më 7 dhjetor 2020. Seanca për shqyrtimin e lëndës do të mbahet në ditët në vijim, pas datës 7 dhjetor 2020. Si edhe në çdo rast deri më tani, sapo Gjykata të marrë vendim, për këtë njoftohen me kohë të gjitha palët e përfshira në rast dhe opinioni.
Lëvizja Vetëvendosje ka paraqitur ankesë në gjykatë mbi kushtetueshmërinë e votës së deputetit Etem Arifi mbi Qeverinë e Kryeminsitrit të Kosovës, Avdullah Hoti.
VV thotë se vota e deputetit Arifi duhet të shpallet e pavlefshme pasi që në atë kohë ai kishte procedurë penale për të cilën tashmë është i arrestuar./InLajmi/
