Mungesa e deputetëve është kthyer në rutinë në Kuvendin tonë, por mungesë të deputetëve ka pasur edhe në mbledhjen e Komisionit Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve, raporton InLajmi.
Mungesa e deputetëvë ka bërë që kjo mbledhjë të dështojë. Sot ishin ftuar që të raportojnë Muhamet Malësiu, drejtor i Departamentit të Mjedisit dhe Ujërave dhe Gani Berisha dhe drejtori i Autoritetit të Rajonit të Pellgjeve Lumore nga ministria e Ekonomisë dhe Ambientit.
Deputeti i LDK-së, iniciues i Komisionit, Haxhi Avdyli, ka kërkuar që kjo mbledhje të shtyhet për të hënën e ardhshme. Poashtu ai informoi se të hënën do të raportojë Arban Abrashi dhe drejtoresha e Institutit Meteorologjik.
“Kjo mbledhje shtyhet për të hënën e ardhshme. Propozoj që kohën dhe orën ta vendosim bashkërisht. Për të premtën informoj që do të raportojë Arban Abrashi dhe drejtoresha e Institutit Meteorologjik”.
Mësohet se edhe raportimi i kryetarit të Deçanit, Bashkim Remosja është shtyrë për të hënën. /InLajmi/
