Gjykata Kushtetuese e Kosovës nesër do të mbajë një seancë dëgjimore, ku do të diskutohet për ligjshmërinë e votës së deputetit Etem Arifi, përcjell InLajmi.
Këtë lajm Gjykata Kushtetuese e ka bërë të ditur përmes një njoftimi për media ku ka dhënë detaje për seancën e ditës së nesërme.
“Gjykata Kushtetuese e Republikës së Kosovës do të mbajë seancë dëgjimore publike, të mërkurën, më 2 dhjetor 2020, duke filluar nga ora 10:00, në të cilën do të shqyrtohet kërkesa KO95/20, që për objekt të shqyrtimit ka: “Vlerësimin e kushtetutshmërisë së Vendimit të Kuvendit të Republikës së Kosovës Nr. 07/V-15, të miratuar më 3 qershor 2020, përkitazi me zgjedhjen e Qeverisë së Kosovës””, thuhet në njoftim.
Për shkak të rrethanave të krijuara nga COVID-19, seanca dëgjimore do të mbahet përmes një video-konference online.
“Për shkak të rrethanave të krijuara si rrjedhojë e pandemisë COVID-19, seanca dëgjimore publike do të mbahet nëpërmjet video-konferencës (online), përmes platformës Zoom. Gjykata ka ndërmarrë të gjitha masat adekuate dhe në përputhje me udhëzimet e institucioneve shëndetësore për mbarëvajtjen e punës së gjyqtarëve gjatë seancës dëgjimore”, thuhet në njoftim, ku është publikuar edhe linku ku kjo seancë mund të shikohet online./InLajmi/
