Kanë mbetur edhe pak orë deri në përfundimin e procesit zgjedhor në komunat ku po mbahen zgjedhjet komunale, raporton InLajmi.
Për mënyren e procesit të zgjedhjeve Kryetarja e KQZ-së Valdete Daka, ka thënë se nuk ka parregullësi dhe procesi është duke vazhduar normalisht.
“Deri më tani, nuk kemi pranuar informacione për ndonjë parregullësi dhe se procesi i votimit është duke vijuar normalisht. “
Poashtu, ajo tregoi disa statistika të daljes së votuesve në zgjedhjet komunale në Podujevë dhe në Mitrovicën e Veriut.
“Duke u mbështetur në të dhënat e Komisionit Komunal të Zgjedhjeve në komunën e Podujevës, deri në orën 15:00 kanë votuar 29.76% e votuesve apo 26 mijë votues nga 87 mijë e 381 sa është numri i përgjithshëm i tyre. Në Zgjedhjet Lokale të vitit 2017, deri në të njëjtën orë kishin votuar 26 mijë e 37 votues apo 31%.”
“Ndërsa, në komunën e Mitrovicës së Veriut, deri në orën 15:00 kanë votuar 30.3% e votuesve apo 7 mijë e 62 votues nga 23 mijë e 313 votues sa është numri i tyre. Në Zgjedhjet Lokale të vitit 2017, deri në të njëjtën kohë kishin votuar 6 mijë e 275 votues apo 29%.”
Konferenca e katërt për ditën e sotme do të mbahet në orën 19:30 dhe ka të bëjë me të gjithë ecurinë e procesit të votimit si dhe pjesëmarrjen në votime deri në mbylljen e tyre, në orën 19:00./InLajmi/
