Me emërimin e Flakron Shalës, si Konsull i Përgjithshëm në Pragë, që është djali i Deputetit të Aleancës për Ardhmërinë e Kosovës, Haxhi Shala ka ngritur polemika e reagime të shumëta nga shumë personalitete të politikës, përcjell InLajmi.
Lidhur me emërimin e Shalës si Konsull i Përgjithshëm në Pragë, Kryeministri i Kosovës Avdullah Hoti tregoi se për emërimin e tij ai është njoftuar nga mediat dhe gjatë ditës së djeshme u.d e Presidentit, Vjosa Osmani mori veprime konkrete duke shfuqizuar katër dekretet e konsujve në Pragë, Lubjanë, Shkup e Tiranë.
Në mesin e këtyre të shkarkuarve është edhe Bledi Kilaj, i cili ishte emëruar konsull i përgjithshëm në Lubjanë, edhe ky njëri nga fëmijët e ish-zëvëndësministrit të Diasporës dhe njëherit ish-kryetarit të Malishevës nga radhët e PDK-së, Isni Kilaj.
Isni Kilaj në një përgjigje për IndeksOnline, ka komentuar vendimin e fundit të Osmanit, për të cilën thotë se po bën politikë dhe se u.d e presidentit nuk përfaqëson popullin e Kosovës.
“U.D-ja po banë politikë! Ajo anuloi 4 Dekrete të 4 familjeve patriotike që kanë dhënë shumë për lirinë e Kosovës/ shiqo Halim Krasniqi vëllai i Xheva Krasniqit-Lladroci/. Janë edhe intelektual e profesional të gjithë të larguarit. Edhe ashtu djali im nuk ka qenë asnjë ditë në punë sipas atij Dekreti.
Ai Dekret ka kohë që ka dështuar! UD-ja Presidente nuk na përfaqëson të gjithë popullin e Kosovës”, ka thënë ai./InLajmi/
