Kryetari në detyrë i PDK-së, Enver Hoxhaj, ka qëndruar sot në Podujevë, ku me kandidatin e kësaj partie për kryetar të komunës së Podujevës, Naim Fetahu kanë bërë hapjen e fushatës dhe shpalosjen e programit qeverisës, përcjell InLajmi.
Hoxhaj tha se PDK është shembull i qeverisjes së mirë, teksa shtoi se është koha që edhe Podujeva ta provojë këtë qeverisje.
“Në Podujevë është ndalur koha. I keni tre shembuj se si qeverisin partitë politike, sot në vitin 2020. Podujevën, e cila ka mbetur në vend, Prizrenin ku qeverisë VV-ja dhe është një qeverisje e dështuar dhe Ferizajn ku qeverisë Partia Demokratike e Kosovës, e cila është një shembull se si qeveriset në nivelin lokal. Prandaj e ftoj çdo qytetar të Podujevës që kësaj here t’ia japë votën Naim Fetahut”, theksoi Hoxhaj.
Kandidati i PDK-së për kryetar të komunës së Podujevës, Naim Fetahu potencoi se me keqmenaxhimin dhe keqpërdorimin e qeverisjen 20 vjeçare të LDK-së, qyteti i Podujevës ka mbetur i pazhvilluar.
“Sidomos gjatë pandemisë kemi pasur keqmenaxhim e keqpërdorim të madh dhe korrupsion më të madhin në vend. Kemi pasur blerje të produkteve pesë herë më të larta se me çmimin e tregut. Në këtë kohë komuna jonë ka funksionuar pa drejtor të shëndetësisë dhe pa drejtor të shtëpisë së shëndetit”, tha ai.
Zgjedhjet e parakohshme në Podujevë do të mbahen më 27 nëntor të këtij viti./InLajmi/
