Deputetja nga radhët e Lidhjes Demokratike të Kosovës, Besa Gaxherri, ka komentuar deklaratat e deputetëve të Lëvizjes Vetëvendosje, të cilët në seancën e sotme plenare të Kuvendit kanë theksuar se nuk do të marrin pjesë në seancat ku është i pranishëm zëvendëskryeministri Driton Selmanaj.
Ajo për Gazeta Blic, ka theksuar se me apo pa Selmanaj deputetët e LVV-së nuk po marrin pjesë në votime. Derisa kritokon këtë subjekt politik, për faktin se nuk po marrin pjesë edhe në votimin e ligjëve të rëndësishme siç është ai i rimëkëmbjes ekonomike.
“Edhe kjo nuk është befasi nga Vetëvendosja. Vetëvendosja i kap gjithmonë gjërat dhe i përthen në interesat e veta…. Edhe ashtu Vetëvendosja nuk është duke marrë pjesë në votime me ose pa Dritonin. VV është krejtësishtë jo korrekte e jo bashkëpunuese, ka ligje me rëndësi të veçanta që i kërkojnë qytetarët siç është ai për rimëkëmbje ekonomike dhe VV nuk e sheh të arsyeshme qoftë edhe kundërt me votu. Njejtë do të jetë edhe ajo me zotëri Selmanajn”, ka thënë Gaxherri.
Gjatë ditës deputeti i Lëvizjes Vetëvendosje, Dimal Basha, bëri të ditur se nuk do të lejojnë të mbahet asnjë seancë, nëse në të është prezentë, zv.kryeministri, Driton Selmanaj.
“Si Grup Parlamentar kemi vendosur të refuzojmë të lejojmë vazhdimin e çfarëdo seance plenare ku është i pranishëm Driton Selmanaj. Për ne si Lëvizje, ky njeri është i papranueshëm në Kuvend”, ka thënë Basha.
