Jetmir Rudi nga fshati Rudi i Malishevës është raportuar i zhdukur. Familjarët e tij e kanë lajmëruar rastin në Polici, ku edhe kanë kërkuar ndihmë për gjetjen e 28-vjeçarit.
Pasditen e së shtunës është larguar nga shtëpia dhe nuk është kthyer më. Familjarët e kanë lajmëruar Policinë se Jetmiri është zhdukur, teksa kërkimi për 28 vjeçarin po vazhdon ende.
Një familjar i tij ka thënë se në momentin kur ka dalë nga shtëpia, Jetmiri ka qenë i stresuar.
“Jo nuk e kemi gjetur, jemi duke e kërku, dyshime s’kemi, ka qenë i stresum pak. Ka qenë i stresum kur ka dalë i ka thënë nënës po dal te lumi. Këndej kah lumi dhe pjesa tjetër jemi duke e kërkua”, ka thënë një familjar i Jetmirit.
Ai ka deklaruar se Jetmiri nuk ka pasur probleme me askënd.
Ndërkohë, burime brenda Policisë së Kosovës kanë deklaruar se ka dyshime se Jetmiri është rrëmbyer.
“Dyshimet e para janë se 28 vjeçari Jetmir Rudi nga fshati Rud i Malishevës është rrëmbyer. Policia dhe ekipet tjera janë duke tentuar t’i bien në gjurmë, qoftë viktimës apo të dyshuarit”, ka deklaruar ky burim për Gazetën Express.
Ndërkohë, familjarët e Jetmirit mëngjesin e sotëm përmes mediave lokale të Malishevës kanë kërkuar ndihmë për gjetjen e tij.
