Pas këshillit të jashtëzakonshëm virtual për situatën e pandemisë COVID-19, dhe përveç përsëritjes së kontratave të ndryshme të nënshkruara nga BE për sigurimin e vaksinës, si dhe kategorive të shoqërisë që priten t’i marrin të parat kur vaksina të jetë gati, Presidentja e Komisionit Evropian, Ursula von der Leyen, konfirmoi se vendet me të ardhura të ulëta dhe të mesme do të përfitojnë nga platforma ndërkombëtare Covax për sigurimin e vaksinave të para.
Ajo shtoi se ekziston edhe mundësia që vendet anëtare të dhurojnë tepricat e tyre, për shembull për Ballkanin.
“Më i rëndësishmi dhe impresoniuesi është Covax, që e kemi ngritur së bashku me rreth 119 vende që janë anëtarësuar. Parimi është që vendet me të ardhura të larta duhet të financojnë Covax për të garantuar qasjen tek vaksina edhe për vendet me të ardhura të ulëta dhe të mesme”, theksoi von der Leyen
Në konferencën e përbashkët për mediat me kreun e Këshillit të Evropës, Von der Leyen theksoi se BE duhet të heqë kufizimet e koronavirusit ngadalë dhe gradualisht për të shmangur një valë tjetër të infeksioneve.
Duke u ndalur tek buxheti 1.8 trilionë euro dhe vetoja që ka vendosur Hungaria dhe Polonia, presidentja nënvizoi se situata është serioze dhe bëri thirrje që anëtarët e BE duhet të negociojnë, transmeton euronews/al
Edhe kreu i Këshillit të Evropës Charles Michel vuri theksin tek nevoja urgjente për implementimin e paketës financiare çka do të ndihmojë në rimëkëmbjen e ekonomisë.
