Këshilli për Siguri Nacionale në Republikën e Maqedonisë së Veriut, pasi ka shqyrtuar informacionet nga ministri i Shëndetësisë, Venko Filipçe për koronavirusin, ka propozuar që të shpallet 30 ditë gjendje e krizës, përcjell InLajmi.
Këtë e bëri të ditur, presidenti i shtetit, Stevo Pendarovski në konferencën ku u shoqërua nga ministri Filipçe dhe kryeministri Zoran Zaev.
“Kemi folur për gjendjen aktuale me pandeminë e koronavirusit. Ministri Filipçe ka njoftuar për kapacitetet spitalore dhe për riorganizimin e kuadrit për të pranuar pacientët e infektuar. Situata është serioze. Në këtë kuptim, pas shterjes së diskutimit, kemi sjell vendim që të propozojmë shpallje të gjendjes së krizës në territorin e Maqedonisë së Veriut në 30 ditët e ardhshme”, tha presidenti Pendarovski.
Propozimi duhet të kalojë edhe në Qeveri, ndërkaq Presidenti Pendarovski njoftoi se kjo është hera e parë që po shpallet gjendje e krizës për Covid-19. Ai njoftoi se gjendje të krizës ka pasur për të menaxhuar krizën me emigrantët në kufirin me Greqinë, dhe aty si Ushtria dhe Policia veprojnë bashkërisht.
I ka bindur qytetarët, se futja në fuqi e gjendjes së krizës nuk do të thotë edhe miratim i masës anti-Covid siç është ora policore.
“Atë duhet të propozojë Komisioni për sëmundje ngjitëse, pastaj Shtabi i Krizës dhe nëse Qeveria vlerëson se duhet të miratohet, atëherë hynë në fuqi”, tha Pendarovski.
Ndaj propozimit të Këshillit të Sigurisë Nacionale, Qeveria e RMV-së duhet të vendos më së voni deri nesër. /InLajmi/
