Kryeministri i Kosovës, Avdullah Hoti, është takuar sot me ministren e Kulturës, Rinisë dhe Sportit, Vlora Dumoshi, për t’i dhënë mbështetje financiare sportit në këtë kohë pandemie, përcjell InLajmi.
Në këtë takim janë nëshkruar kontrata me 38 Federata Sportive të Kosovës, për ndarjen e mjeteve financiare nga fondi i Qeverisë.
Hoti ka përgëzuar federatat për arritjet që kanë pasur dhe ka falenderuar ato për respektimin e masave anti-Covid.
“Mbështetja që i jep Qeveria federatave është favor, dhe nuk është obligim. Desha me ju falënderua në bashkërendim të aktiviteteve në respektim të masave. Kërkojë që të ju rrini afër të gjitha masave në përmbushje dhe respektim të masave, dhe dëshiroj me ju falënderuar dhe me ju përgëzuar për arritjet që i keni pasur për të gjitha sportet dhe federatat që i mbuloni”, tha Hoti.
Ndër tjerash, Hoti beson që edhe vitin e ardhshëm do të ofrojë një mbështetje të tillë.
“Kemi dëme të mëdha në secilin sport dhe vetëm na duhet një bashkëpunim. Besoj që më këtë të zbusim pak nevojat që i kemi dhe besoj që edhe vitin e ardhshëm e kemi paraparë një pako dhe një mbështetje”, shtoi më tutje ai.
Ministrja e MKRS-së, Vlora Dumoshi, tha se i kanë shpenzuar rreth 4 milionë euro dhe se qëllim kanë të federatave tu krijohen kushtet sa më të mira për funksionim.
“Sot së bashku jemi për të falënderuar për programin që i ke dhënë rëndësi të madhe, por edhe në këto ditë të vështira që jemi ballafaquar më Covidin, ku organizata sportive dhe sot ne do t’i dërgojmë secilës federatë, ku kemi ndarë pesë milionë euro”, tha Dumoshi.
E kryetari i Komitetit Olimpik të Kosovës, Besim Hasani tha se pandemia i ka shkaktuar dëme të mëdha edhe sportit në vend.
“Pandemia ka qenë një problem i madh, po besoj që të gjithë kolegët i kanë kaluar me shumë sportivitet”, ka thënë ai/InLajmi/
