Pas rritjes së rasteve Ministri i Shëndetësisë Armend Zemaj përmes një postimi në Facebook paralajmëroj se mund të ketë masa të reja, përcjell InLajmi.
Zemaj marrjen e masave i sheh si të arsyeshme për mbrojtjen e qytetarëve të Kosovës.
“Janë të arsyeshme shqetësimet e secilës kategori të shoqërisë sonë, por të gjithë së bashku duhet të mendojmë për shëndetin publik”, shkruan Zemaj.
Ministri i Shëndetësisë ka takuar Berat Rukiqi kryetari e Odës Ekonomike të Kosovës, Arian Zeka kryetar i Odës Ekonomike Amerikane, Petrit Kllokoqi kryetar i Shoqatës së Gastronomëve si dhe Hysen Sogojeva kryetarin e Odës Hoteliere të Kosovës, ku kanë diskutuar për masa të reja.
Zemaj shtoi se për rekomandimin e masave të reja do të diskutojë me Kryeministrin e Kosovës Avdullah Hoti.
Sot nga 1.794 mostra të marra brenda 24 orëve, 730 kanë rezultuar pozitiv, me numrin më të lartë të infektuarve prinë Prishtina.
Postimi i plotë i tij:
Para marrjes së masave të reja kam takuar sot z. Berat Rukiqi kryetari e Odës Ekonomike të Kosovës, z. Arian Zeka kryetar i Odës Ekonomike Amerikane, z. Petrit Kllokoqi kryetar i Shoqatës së Gastronomëve si dhe z. Hysen Sogojeva kryetarin e Odës Hoteliere të Kosovës.
Secili nga ne ndjejmë përgjegjësinë për mbarëvajtjen e shëndetit publik dhe shëndetësisë, andaj është qenësore që të gjithë se bashku, nga aty ku veprojmë t’i zbatojmë rregullat për të parandaluar përhapjen e virusit sikurse dhe udhëzimet që dalin nga Manuali për Mbrojtje nga Përhapja e Covid19
Janë të arsyeshme shqetësimet e secilës kategori të shoqërisë sonë, por të gjithë së bashku duhet të mendojmë për shëndetin publik.
Rekomandimet e marra gjatë takimit të sotëm, do t’i diskutoj me kryeministrin z.Hoti në mënyrë që masat e marra nga Qeveria të prekin sa më pak ata dhe të jenë sa më të lehta për të gjithë ne.
Edhe sot nga 1.794 mostra të marra brenda 24 orëve, 730 kanë rezultuar pozitiv, vetëm në Prishtinë janë 312 raste pozitive me Covid 19, shifra këto që na detyrojnë të jemi të sa më të kujdeshëm në respektimin e masave anti Covid /InLajmi/.
