Sulmuesi kosovar Vedat Muriqi do të luajë titullar për Lazion kundër kampionit italian Juventus, në derbin e kësaj jave në Serie A.
Lazio e pret Juventusin në Stadiumin Olimpik në Romë, për ballafaqimin e xhiros së 7-të, që nis në orën 12:30.
Kjo do të jetë ndeshja e 2-të që përfaqësuesi i Kosovës Muriqi luan titullar në ligë për skuadrën e Simeone Inzaghit.
Muriqi është ende në kërkim të golit të parë për Lazion – të cilës iu bashkua këtë verë nga Fenerbahce.
Sulmuesi nga Prizreni i ka bërë 3 paraqitje në ligë dhe tri të tjera në Ligën e Kampionëve deri tani për Lazion, transmeton Periskopi.
Lazio do të përballet me mungesa të shumta sot, përfshirë sulmuesin kryesor Ciro Immobile, portierin shqiptar Thomas Strakosha dhe mesfushorin Lucas Leiva, të cilët janë prekur nga koronavirusi.
Ndërkohë, te Juventusi mungojnë Giorgio Chiellini, Matthijs de Ligt, Aaron Ramsey dhe Alex Sandro.
