Profesori i Kriminalistikës, Fatmir Qollakaj, ka thënë se sulmet terroriste sikur ai i djeshmi në Vjenë të Austrisë – ku mbetën të vdekur pesë persona dhe mbi 20 të tjerë u plagosën – janë ngjarje shqetësuese.
Ai në Info Magazine të Klan Kosovës ka thënë se ky sulm terrorist është një tregues se terrorizmi vazhdon të jetë një nga kërcënuesit serioz të sigurisë.
“Këto ngjarje janë shqetësuese dhe të trishta kudo që ndodhin. Janë shqetësuese për faktin se pasiguria dhe frika ndjehet në gjithë rajonin dhe më gjerë. Terrorizmi edhe më tutje është një nga kërcënuesit seriozë të sigurisë, jo vetëm nacionale dhe rajonale, por edhe asaj ndërkombëtare. Jemi dëshmitarë të shumë akteve terroriste në pesë vjetët e fundit të cilat kudo që ndodhin – Bruksel, Paris, Vjenë, Romë apo kudo tjetër – shumë shpejt përhapin frikë dhe shkaktojnë pasiguri, që është edhe qëllimi kryesor i terrorizmit në përgjithësi”.
Por, çka nënkupton termi “terrorizëm”?
“Në aspektin etimologjik rrjedh nga fjala franceze “le terror” që i bie dhunë, situatë e dhunshme ku ka viktima në njerëz, pasiguri të lartë dhe frikë të vazhdueshme – një situatë e rëndë. Në literaturën bashkëkohore thuhet se nuk ka definicion konsensual për terrorizmin, ka përpjekje për definimin e tij, por në esencë të gjithë dakordohen se është fjala për një veprimtari rrënuese që mund ta udhëheqin dhe realizojnë grupe të vogla, të mëdha, ose organizata të fuqishme. Në dy deceniet e fundit shënon një kthesë të madhe në kuptimin organizativ dhe atë operativ ku bartës i aktivitetit terrorist mund të jenë edhe persona të vetëm”.
Profesori Qollakaj ka thënë se sulmi i djeshëm në Vjenë dhe ai i para disa ditëve në Francë edhe nëse nuk kanë ndërlidhje organizative patjetër që e kanë një ndërlidhje logjike.
“E shoh si reagim ndaj provokimeve që janë bërë me karikaturat e Profetit Muhamed. Unë kam një kritikë racionale për civilizimin perëndimor dhe krerëve të shtetit, në këtë rast edhe Francës si personifikim i një shteti demokratik me histori të gjatë të demokracisë, se nuk duhet të shkohet në emër të një demokracie të mirëfilltë dhe lirisë së shprehjes në provokime të tilla që lëndojnë shpirtërisht përkatësinë myslimane, gjegjësisht Islamin”.
“I dyshuari për kryerjen e veprës terroriste është 20-21 vjeçar, pra bëhet fjalë për moshë të re të cilët shumë lehtë mund të indoktrinohen skajshëm dhe të veprojnë me agresivitet të parë duke shkaktuar vdekje edhe personave të pafajshëm”.
Ai duke folur për karikaturat e Profetit Muhamed që nxitën reagime të ashpra tek besimtarët myslimanë ka thënë se nuk duhet inkurajuar qarqet artistike dhe fetare që duke u thirrur në liritë dhe të drejtat e tyre të lëndojnë një komunitet të tërë, trasnemton Klan Kosova.
“Jo që të inkurajohen qarqet satirike dhe artistike që të vazhdojnë provokimin përmes satirave dhe karikaturave të tilla, sepse qytetarët e përkatësisë myslimane po ndihen të provokuar. Të mos inkurajohen qarqet artistike dhe të tjera të cilat në emër të lirisë së shprehjes dhe të drejtave të tyre të pakufizuara mund të atakojnë shpirtërisht dhe emocionalisht një komunitet të tërë nga e cila mund të derivojnë veprime dhe akte të tilla që godasin sigurinë ndërkombëtare në përgjithësi”.
