Deputeti i Partisë Demokratike të Kosovës, Abelard Tahiri, ka kritikuar Qeverinë e udhëhequr nga kryeministri Avdullah Hoti, ku tha se skandalet e një pas njëshme të qeverisë së udhëhequr nga Avdullah Hoti, kanë dëmtuar integritetin e vendit, raporton InLajmi.
Tahiri në një konferencë për media tha se shuarja e Task Forcës Kundër Korrupsionit që hetonte aferat korruptive të zyrtarëve të lartë qeveritar, skandali i vjedhjes së 2 milionë eurove dhe tenderi 5 milionë euro i dhënë për kompaninë e ministrit Kuçi, nuk duhet do të kalohen në heshtje.
Për këto skandale të Qeverisë, deputeti Tahiri ka kërkuar dorëheqje e shkarkime të ministrave Hykmete Bajrami dhe Blerim Kuçi.
“Kryeministri Hoti do të mbahet mend si tolerues i një precedenti të këtillë, aq të rrezikshëm e të pa pranueshëm, për të cilin, as ai dhe as ministri Kuçi, nuk kanë ndërmarrë asnjë veprim, e nuk janë ndjerë as të keq ardhur për një gjë të tillë, tha deputeti Tahiri.
Sipas tij Partia Demokratike e Kosovës, vlerëson se këto skandale, e kanë sfiduar më shumë se kurrë, integritetin e institucioneve publike, dhe e kanë lënduar më shumë se kurrë, besimin që qytetarët duhet ta kenë në institucione.
“Përgjegjësia për këto skandale tashmë nuk është zgjidhje. Është detyrë. Prandaj ne kërkojmë nga Kryeministri Hoti, që përmes shkarkimit të këtyre dy ministrave, si dhe tërheqjes së vendimit për shuarjen e Task Forcës Kundër Korrupsionit, ta shënojë aktin e parë të ndaljes së degradimit të mëtejmë të qeverisjes në vend”, përfundoi ai./InLajmi/
