Ehat Miftaraj nga Instituti i Kosovës për Drejtësi ka thënë se rasti i vjedhjes së 2 milionë eurove nga Thesari i Shtetit vë në pah shumë probleme sistematike në administratën publike.
Sipas tij, publiku e mësoi se në kuadër të Ministrisë së Financave nuk ka sistem të verifikimit dhe kontrollit lidhur me qasjen dhe procesimin e pagesave apo transaksioneve.
Miftaraj po ashtu tha se kjo dëshmon edhe mungesën e integritetit të zyrtarëve publik, të cilët pa hezitim e shkelin besimin publik dhe kryejnë veprime penale të cilat dëmtojnë buxhetin e shtetit.
“Në radhë të parë publiku mësoi se në kuadër të Ministrisë së Financave nuk ka sistem të verifikimit dhe kontrollit lidhur me qasjen dhe procesimin e pagesave apo transaksioneve që në rastin konkret flasim për miliona euro. Në anën tjetër, e dëshmon integritetin e zyrtarëve publik të cilët pa hezitim e shkelin besimin publik dhe kryejnë veprime penale të cilat dëmtojnë buxhetin e shtetit”, ka thënë Miftaraj, përcjell Telegrafi.
Ndryshe, brenda dy ditësh në Kosovë kanë ndodhur 2 vjedhje në 2 institucione.
