Deputeti i AAK-së, Bekë Berisha, ka reaguar ndaj një lajmi të rremë se kinse ai ka thënë se “ata që e votojnë Albin Kurtin e kanë vendin në Shtime”, përcjell InLajmi.
Berisha e ka quajtur të pa vërtetë dhe me qëllim thellimin e përçarjeve në skenën politike dhe për disa klikime më shumë.
Ai ka thënë se nuk është në traditën familjare dhe karakterin e tij të fyej ose flas diçka që bie ndesh me rregullat e demokracisë.
Postimi i plotë i tij:
Të nderuar qytetarë,
Ditëve të fundit, një faqe në rrjetin social facebook, e quajtur “ALKS PRESS” ka publikuar një lajm se kinse unë, Bekë Berisha në një intervistë kam thënë se ‘ata që e votojnë Albin Kurtin, e kanë vendin në Shtime’. Kjo është e pa vërtetë dhe ka për qëllim thellimin e përçarjeve në skenën politike, dhe për disa klikime më shumë.
Nuk është as në traditën time familjare, as në karakterin tim si përfaqësues I qytetarëve, e as në fjalorin e partisë të cilën e përfaqësoj që të fyej ose flas diçka që bie ndesh me rregullat e demokracisë. Unë gjithnjë kam folur me forcën e argumenteve, por pa degraduar asnjëherë në komunikimin tonë politik.
Pra, ju bëj thirrje gjithë qytetarëve, mos të bien pre e lajmeve të rreme dhe tendencioze. Ne jemi në parti të ndryshme dhe me bindje ndryshe ndaj njëra-tjetrës, por gjithmonë duke respektuar mendimin dhe bindjen e tjetrit. As sot, e as kurrë nuk ndodh që unë të devijoj nga rruga e drejtë dhe nga fjalori tradicional I yni I përcjellur brez pas brezi.
I juaji,
Bekë Berisha/InLajmi/
