Ministri i Infrastrukturës, Arban Abrashi ka treguar se si është kuptuar në ministrinë e drejtuar nga ai se po mungojnë fonde nga projekte të ndryshme.
Abrashi, në “Debat Plus” me Ermal Pandurin në RTV Dukagjini thotë se punëtorët e Ministrisë së Infrastrukturës e kanë vërejtur se ka ndodhur një transaksion i dyshimtë dhe mjetet që është dashur të shkojnë në disa projekte të Ministrisë së Infrastrukturës kanë munguar.
Abrashi thotë se megjithatë për transferimin e këtyre mjeteve janë përdorur së paku edhe katër aksese tjera.
“Deri më tani është parë që ka ndodhur një lëshim teknik dhe një keqpërdorim i dikujt në Thesarin e vendit. Pra një zyrtarë i Thesarit ka keqpërdoruar qasjen e tij dhe ka krijuar edhe qasje tjera pasi duhen së paku edhe katër apo pesë qasje për t’u kryer transferi”, deklaroi Abrashi.
Ministri i Infrastrukturës thotë se zyrtarët qeveritar nuk mund të ndërhyjnë në punët e personave që punojnë në Thesarin e Shtetit.
“Ata janë persona që trajnohen dhe janë staf civil”, transmeton Telegrafi.
Abrashi thotë se megjithatë nga Ministria e Infrastrukturës ka transfere të tilla për projekte madhore dhe sipas tij personat që kanë bërë këtë keqpërdorim kanë menduar se nuk do të vërehen.
