Ministrja e Kulturës Vlora Dumoshi ka marrë pjesë në inaugurimin e palestrës sportive, e cili ka kushtuar prej 2 milionë euro, përcjell InLajmi.
Në përurimin e saj ka marrë pjesë edhe kryeministri Avdullah Hoti, si dhe kryetari i Deçanit, Bashkim Ramosaj.
Dumoshi ka thënë se kjo është një ndër palestrat më moderne që plotëson kushtet për ndeshje ndërkombëtare.
Postimi i plotë i saj:
Sot, me Kryeministrin e Kosovës, Avdullah Hoti vizituam Deçanin ku bashkë me kryetarin Bashkim Ramosaj dhe bashkëpunëtorë përuruam palestrën e sportit në Deçan, projekt i financuar nga Ministria e Kulturës, Rinisë dhe Sportit.
Projekti ka kaluar nëpër tri faza të punimeve dhe kap vlerën totale prej 2,000.000 €. Është ndër palestrat më moderne e që plotëson kushtet për zhvillimin e ndeshjeve kombëtare dhe ndërkombëtare sipas kritereve të Federatës botërore dhe Evropiane të Hendbollit (IHF dhe EHF). Poashtu plotëson të gjitha kriteret për zhvillimin e ndeshjeve në Basketboll në nivel kombëtar dhe ndërkombëtar duke i plotësuar të gjitha kriteret e FIBA-s. Me këtë rast ekipet nga Kosova mund të zhvillojnë ndeshje të karakterit ndërkombëtar.
Mbi të gjitha palestra i ndihmon zhvillimit të jetës sociale në Deçan dhe i shton bukurinë qytetit dukagjinas.
MKRS ka mbështetur vazhdimisht projekte nëpër tërë Kosovën të cilat kanë për synim rregullimin e infrastrukturës sportive.
Qeveria Hoti dhe MKRS në vazhdimësi po angazhohen që edhe projekte tjera të ngjashme të shohin dritën sa më shpejtë, konform rregullave dhe kritereve kombëtare e ndërkombëtare./InLajmi/
