Ata kanë kërkuar shuma të mëdha të parave, derisa buxheti i KGJK-së është i limituar, pasi fondi i ndarë nga Qeveria e Republikës së Kosovës, për kategorinë e personave të dënuar ose arrestuar pa arsye ka qenë dhe është 500 mijë euro.
Sipas të dhënave që Këshilli Gjyqësor i Kosovës ka dhënë për lajmi.net nga data 1 janar 2020 deri me tani janë kompensuar 87 persona në shumën prej 232 mijë e 529 euro.
Ndërsa gjatë viti 2019 janë kompensuar 185 persona, ku shuma e ndarë për këta nga shteti i Kosovës është 455,011.41 euro.
Po ashtu, Gjykata me aktgjykim të plotfuqishëm ju ka njohur të drejtën e kompensimit dy personave, njërit në shumën prej 50 mijë 300 euro, si dhe tjetrit 80 mijë 301 e 8 cent. “Ndaj këtyre vendimeve është ushtruar mjet juridik i jashtëzakonshëm po ashtu këto çështjet janë në procedurë përmbarimi”, thotë KGJK.
Në anën tjetër, sipas avokatit Tomë Gashi, kompensimet nga ana e shtetit për personat, të cilët arrestohen apo dënohen padrejtësisht janë qesharake dhe ofenduese.
Ai thotë se u ofrohet një shumë prej 20 eurove maksimale për 24 orë të arrestimit, të paraburgimit apo të dënimit, të dikujt që vërtetohet që ka qenë jo i drejtë dhe jo i ligjshëm.
“Shteti faktikisht i kompenson vetëm kur nuk ka çfarë të bëjë më tepër, kur është i obliguar në bazë të detyrimeve ligjore dhe kompensimet që u behën personave të arrestuar padrejtësisht janë qesharake, mos të themi edhe ofenduese. Thjesht i ofrohet një shumë prej 20 eurove maksimale për 24 orë të arrestimit, të paraburgimit apo të dënimit, të dikujt që vërtetohet që ka qenë jo i drejtë dhe jo i ligjshëm. Dhe kjo është fyese që dikush që mbahet në paraburgim për 24 orë faktikisht paguhet më pakë së një euro ora e qëndrimit në paraburgim, pra është tejet ofenduese, përveç që është tepër e vogël”, tha Gashi për lajmi.net.
Kompensim financiar nga shteti e Kosovë kanë kërkuar edhe figura të larta politike, të cilët u shpallën të pafajshëm nga Apeli. Ndër ta janë Sami Lushtaku, ish-komandat i UÇK-së dhe ish-kryetar i Komunës së Skenderajt, i cili u shpall i pafajshëm. Lushtaku ishte dënuar më 12 vite burg, katër prej të cilave e kishte vuajtur dënimin. Pasi u shpall i pafajshëm Lushtaku kërkon dëmshpërblim prej 1.4 milion euro nga shteti.
Po ashtu 7 milionë dëmshpërblim, pasi u shpall i pafajshëm në rastin “Kleçka” ka kërkuar edhe Fatmi Limaj.
Ndërsa, ish-guvernatori i Bankës Qendrore të Kosovës, Hashim Rexhepi kërkon mbi 1 milion e gjysmë euro dëmshpërblim nga shteti i Kosovës me pretendimin se pa të drejtë ishte mbajtur në paraburgim si dhe për masat tjera për sigurimin e pranisë së tij.
25 milionë euro dëmshpërblim nga shteti ka kërkuar edhe avokat Tomë Gashi në emër të familjes Sopa, dy vajzave dhe nënës, të cilat qëndruan në paraburgim për 177 ditë nën akuza së kishin vrarë babain e tyre përkatësisht burrin, Hamdi Sopa.
