Një aksident trafiku ka ndodhur në qytetin e Pejës me ç’rast janë lënduar 4 persona.
Rreth orës 15:00 në dalje të qytetit të Pejës ka ndodhur një aksident trafiku mes 2 veturave, ku për pasojë 4 persona kanë mbetur të lënduar.
Këtë e ka konfirmuar për lajmi.net, zëdhënësi i Policisë së Kosovës për rajonin e Pejës, Driton Rugova.
Sipas Rugovës, 4 të lënduarit janë dërguar për trajtim në Spitalin e Pejës dhe se gjendja e tyre është jashtë rrezikut për jetë.
“Rreth orës 15:00 ka ndodhur një aksident mes dy veturave në afërsi të Universitetit “Haxhi Zeka”, me ç’rast si pasojë e aksidentit katër persona kanë pësuar lëndime trupore. Të lënduarit janë dërguar menjëherë në Spitalin e Pejës për trajtim të mëtutjeshëm dhe gjithnjë sipas ekipit mjekësor gjendja e tyre është jashtë rrezikut për jetë”, ka treguar Rugova.
Sipas tij, ekipet relevante janë në vendin e ngjarjes për hetimet e mëtutjeshme.
