Kryetarja e Kuvendit Vjosa Osmani dhe kryetari i LDK-së, Isa Mustafa kanë shkëmbyer një sërë akuzash sot gjatë ditës. Vjosa Osmani përmes një shkrimi në Facebook është përkujdesur që ta quajë mashtrues e recidivist Shefin e LDK-së.
Osmani në statusin kushtuar Isa Mustafës në Facebook ka thënë se ai është humbës i shumëfishtë i zgjedhjeve dhe nuk ka guxuar të kandidojë për kryeministër kundër Kurtit përveç njërit në LDK duke mos përmendur emra.
Për këtë gjë Gazeta Express ka pyetur nënkryetarin e LDK-së nëse kryekuvendarja Osmani e ka pasur fjalën për të kur ka thënë se të gjithë në LDK me një përjashtim nuk kanë guxuar të përballen me Kurtin.
Haziri ka thënë shkurt se nuk e di çfarë ka menduar Osmani por që ai e ka mbështetur nominimin e saj për kandidate për kryeministre në zgjedhjet e gjashtë tetorit.
“Nuk e di, pytne Vjosën çka ka mendu. Unë e kam mbështet nominimin e Vjosës”, ka thënë shkurt Haziri për Express të martën.
Kryetari i LDK’së, Isa Mustafa dhe kandidatja e para një viti për kryeministre nga kjo parti, Vjosa Osmani sot janë përplasur verbalisht duke akuzuar njëri-tjetrin për humbje të zgjedhjeve.
Isa Mustafa sot gjatë ditës ka thënë Vjosa Osmani ia ka humbur zgjedhjet LDK’së duke u bërë kopje e Albin Kurtit.
Teksa, Kryetarja e Kuvendit, Vjosa Osmani ndërkaq ia ka kthyer Mustafës duke e quajtur mashtrues, recidivist e bashkëpunëtor me kapësit e shtetit.
