Partia Socialdemokrate ka realizuar një aksion simbolik për të kundërshtuar aplikimin e interesave ndaj kredive të qytetarëve të cilët i patën shtyrë pagesën e kësteve për tre muaj gjatë kohës së pandemisë.
Por, me këtë rast Policia e Kosovës i ka shqiptuar një gjobë prej 400 eurove kësaj partie për realizimin e këtij aksioni.
Zëdhënësja Natyra Kuçi, tha se as vet policët nuk e kishin të qartë se pse po i gjobitnin aktivistët e PSD-së.
Kuçi shtoi se në kohen e pandemisë ishin organizuar edhe protesta tjera, por që nuk ishte dënuar askush, as organizatori dhe as pjesëmarrësit.
“Në atë moment ne ishim disa persona duke respektuar çdo masë e cila është e caktuar për pandeminë. Ishim me maska duke e bërë atë aksion simbolik dhe vijnë diku shtatë deri në tetë policë të cilët grumbullohen kokë më kokë për të shqiptuar dënim ndaj dy organizatorëve ndaj dy aktivistëve të PSD-së Nol Nushi dhe Teutë Rrusta”.
“Dënimi u shqiptua me arsyetimin se duhet ta bëjmë megjithëse edhe policët pajtoheshin me qëllimin e kësaj proteste. Mirëpo u shqiptua ai dënim pa e pasur edhe ata të qartë pse. Edhe këtu vërehet presioni dhe dominimi i fuqisë dhe kapitalit mbi shtetin. Nuk pati asnjë lloj shkelje tjetër. Aksioni ishte i organizuar kundër sistemit bankar që nuk zbatuan anulimin e interesit për këstet e kredisë. Kreditë u rritën, me gjithë premtimin se këto nuk do të zbatoheshin në tre mujorin pasi të kaloi”.
“Për ta konkretizuar këtë. Ka pasur protesta gjatë pandemisë ku ka pasur qindra qytetarë që mblidheshin. Askush nuk është dënuar as qytetari dhe as organizatori. Në anën tjetër kemi disa aktivistë të PSD-së që bën një grumbullim të vogël që tregojnë një moment jetik që ka kapluar kriza qytetarin. Ne u penguam dhe u dënuam me 400 euro”.
Ajo shtoi se shteti me këtë rast po e përkrah këtë sistem bankar që po aplikon interesin në kredi edhe pasi ato ishin planifikuar të mosaplikoheshin.
“Nuk është shuma e rëndeësishme sa është e rëndësishme të ceket se shteti u rreshtua në krah të bankave ku në vend se të ulej fitimi i tyre në këtë kohë krize ata realizuan fitimi milionëshe”, shkruan Klan Kosova
Sipas saj as qeveria aktuale por as ajo e kaluara nuk kanë mbajtur premtimet.
