Kryeministri Avdullah Hoti nga Washingtoni, tha se Kosova ka momentin më të mirë se asnjëherë më parë për të përmbyllur formimin e shtetësisë së saj.
Për këtë gjë ai ripërsëriti kërkesën e tij për ta mbështetur këtë proces edhe partitë opozitare, pa votën e së cilës nuk mund të ratifikohet marrëveshja në rast se arrihet, njofton Klan Kosova.
“I ftoj të gjithë edhe Vetëvendosjen edhe opozitën që të jemi të bashkuar në këtë çështje në konsolidimin e shtetësisë së Kosovës në arenën ndërkombëtare. Kemi mjaft tema që mund të bëjmë garë politike. Dialogu është temë strategjike, është momentum i jashtëzakonshëm për ta përmbyllur pasi kemi mbështetje të madhe të miqve kryesorë. S’është pasqyrë e mirë kur për çështje të tilla të zhvillohet rivalitet politik”.
Përkundër akuzave të Vetëvendosjes se Qeveri Hoti nuk e ka legjitimitetin dhe legalitetin për të biseduar për fatin e Kosovës, vetë kryeministri thotë se detyrat e tyre janë në përputhje të plotë me Kushtetutën e vendin dhe se i ka kompetencat e plota dhe legalitetin e plotë për bisedimet me Serbinë.
Por, a do të bëjë kompromis Avdullah Hoti siç ka paralajmëruar Aleksandër Vuçiqi serbët?
“Të gjitha kompromiset Kosova i ka bërë me Pakon e Ahtisaarit. Krejt Kushtetuta e Kosovës është kompromis sa i përket komuniteteve. E kemi kryer fazën e kompromiseve për të vazhduar më tej. Momentum më të mirë nuk shoh. Ne duhet të tregojmë maturinë shtetëore për t’i dhënë frymë procesit të dialogut derisa shihemi si pala konstruktive e tij. Nuk shtrohet asnjëherë në diskutim çështja e pavarësisë dhe integritetit territorial. Ajo që na kërkohet neve është të dialogojmë se si t’i normalizojmë marrëdhëniet”.
Hoti në Klan Kosova tha se nuk mund të jep përgjigje nëse në këtë takim të 4 shtatorit mund të merr pjesë edhe presidenti amerikan Donald Trump, por tha se me sekretarin e shtetit Mike Pompeo do të takohen të premten.
“Do të jem i hapur dhe transparent për dinamikat. Kemi ardhur të përgatitur dhe do të jemi të gatshëm të lëvizim përpara. Ne do të donim që të përmbyllet kjo çështje sa më parë, por jo gjithçka varet nga ne. Ne po e bëjmë maksimumin me parime të qarta dhe që nuk kontestohen fare nga miqtë tonë”.
Se marrëveshja Kosovë-Serbi duhet të përfundojë me njohje reciproke, Hoti tha se nuk ka pasë asnjë hezitim nga miqtë perëndimorë për këtë.
“Dialogu përfundon me njohje reciproke dhe është i kufizuar në kohë brenda javësh dhe muajsh dhe jo një dialog që s’ka fund. Mbi këto parime kam pasë asnjë hezitim nga miqtë”.
Po ashtu, kryeministri ripërsëriti se në rast të nënshkrimit të marrëveshjeve ekonomike Kosova në pesë vjetët e ardhshme do të bëhet vendi kyç në rajon për ekonomi.
