Gjashtë zyrtarë policorë janë suspenduar nga drejtoria Rajonale e Policisë së Kosovës, në Mitrovicën e Veriut me arsyetimin se nuk kanë reaguar në nivelin e duhur profesional në një incident (përleshje fizike) e cila ka ndodhur të martën pasdite në mes të disa personave në sheshin ‘Car Llazar”.
Sipas një njoftimi për media nga Inspektorati Policor i Kosovës, thuhet se ekziston dyshimi se disa zyrtarë policorë kanë dështuar të reagojnë bazuar në autorizimet e tyre për ruajtjen e rendit dhe qetësisë publike
Thuhet në njoftim në mesin e gjashtë të suspenduarëve është edhe një zyrtar policor me gradën e kapitenit.
“Zyrtarët e Policisë së Kosovës në Mitrovicën e Veriut kanë reaguar pasi dje në orët e pasdites një rast të rrahjes në mes pesë personave të dyshuar në rrugën “Mbreti Petër”. Të dyshuarit e përfshirë në këtë incident janë shoqëruar në stacionin policor si dhe të lënduarve u është ofruar tretman mjekësor. Sidoqoftë, ekziston dyshimi se disa zyrtarë policorë kanë dështuar të reagojnë bazuar në autorizimet e tyre për ruajtjen e rendit dhe qetësisë publike dhe nuk kanë reaguar në nivelin e duhur profesional në këtë incident. Bazuar në këtë, Drejtori Rajonal i Policisë së Kosovës në Mitrovicën e Veriut ka suspenduar 6 zyrtarë policorë (në mesin e tyre edhe një zyrtar policor me gradën e kapitenit ). Lidhur me rastin është i njoftuar edhe Inspektorati Policor i Kosovës. Hetuesit e IPK-së në përputhje me autorizimet ligjore dhe fushëveprimin e Inspektoratit Policor kanë filluar një procedurë hetimore preliminare në koordinim edhe me prokurorinë kompetente”, thuhet në njoftimin e IPK-së, transmeton Telegrafi.
Ndryshe, të martën në media është raportuar për një përleshje fizike në mes të disa personave në një kafiteri në veri të Mitrovicës, ndërsa zyrtarë të Policisë së Kosovës edhe pse ishin prezent në këtë incident nuk reaguan për ruajtjen e rendit të qetësisë.
