Eksperti amerikan për çështje të Ballkanit, Daniel Serwer, thotë se nuk është mjaft i sigurt nëse diçka do të nënshkruhet në takimin e 4 shtatorit mes Kosovës dhe Serbisë në Uashington, por nuk përjashtoi mundësinë e arritjes së “disa marrëveshjeve në fushën ekonomike, duke përfshirë edhe atë për Trepçën dhe Ujmanin”.
Sipas Serwer, është e mundur të arrihet një marrëveshje për zona speciale ekonomike përgjatë kufirit Kosovë – Serbi.
“Gjithashtu, një marrëveshje për zona të veçanta ekonomike përgjatë kufirit midis Kosovës dhe Serbisë është e mundur.
Dyshoj që do të ketë marrëveshje për gjëra të mëdha të cilat ndikojnë në normalizimin e marrëdhënieve mes dy vendeve, pasi krijohet përshtypja se Beogradi nuk është i interesuar të pranojë pavarësinë e Kosovës, kurse Prishtina nuk mund të pranojë asgjë më pak se kjo. Kryeministri Hoti ka një shumicë të vogël në parlament dhe nuk dëshiron të rrezikojë”, thotë Serwer.
