Balaj-Halimaj dhe Zemaj ofrojnë ndihmë për QKFM-të dhe Spitalin Regjional të Prizrenit

Zëvendëskryeministrja Albulena Balaj-Halimaj dhe Ministri i Shëndetësisë Armend Zemaj kanë qëndruar në Prizren ku janë takuar me kryetarin e kësaj komune Mytaher Haskuka, ku këta të fundit kanë ofruar përkrahje nga qeveria për Spitalin Regjional të Prizrenit, përcjell InLajmi.

Këtë njoftim e bëri Balaj-Halimaj në rrjetin social facebook ku tha se ka shprehur mirënjohjen për të gjithë mantelbardhët jo vetëm në Prizren, por në të gjithë vendin në betejën kundër koronavirusit.

Postimi i plotë i saj:

Sot, së bashku me Ministrin e Shëndetësisë, Armend Zemaj, vizituam Kryetarin e Komunës së Prizrenit, Mytaher Haskuka, QKMF-në në Prizren, Spitalin Regjional dhe Institutin Rajonal të Shëndetësisë Publike të këtij qyteti për të parë nga afër punën që po bëjnë mantelbardhët në luftimin dhe parandalimin e COVID-19.

Bashkë me ministrin Zemaj ofruam përkrahjen e fuqishme të Qeverisë së Kosovës për këto institucione shëndetësore në Prizren dhe ditët në vijim, ne do të ulemi dhe do të diskutojmë për gjetjen e një formule të përbashkët për t’i dalur në ndihmë QKMF-së dhe Spitalit Regjional të këtij qyteti me mjete shtesë të cilat ata i konsiderojnë si të domosdoshme.