Gjysmënalja e Champions League është një mallkim që nuk po thyhet dhe që po vazhdon të përndjekë Pep Guardiolan nga momenti që ka marrë drejtimin e Manchester City në verë të vitit 2016.
Është ndalur gjithmonë në 1/8-at (një herë), në çerekfinale (tri herë), kurrë nuk ka arritur ta udhëheqë Cityn përtej asaj pengese, që është kaluar nga Qytetarët me Manuel Pellegrinin në sezonin 2015/16.
Këtë herë ka qenë Lyoni që ka prishur planet e ish-trajnerit të Barcelonës (me katalanasit ka fituar dy Champions, në 2009-ën dhe 2011-ën), duke u mposhtur 3-1, ndërsa në të kaluarën ëndrra është shuar nga Monaco, Liverpool dhe Tottenham.
Zhgënjimi i Manchester City dhe trajnerit të tij merr përmasa më dramatike kur bëhet llogaria e milionave të shpenzuara nga klubi anglez në këto katër vite me trajnerin spanjoll: pothuajse 800 milionë euro, më saktësisht 778 milionë janë shpenzuar në sjelljen e shumë, shumë futbollistëve në Etihad, por në fund asgjë, raporton telesport.
