Sipas kolegjit amerikan të gastroenterologjisë, më shumë se 15 milionë amerikanë vuajnë nga djegësima në lukth çdo ditë.
Djegësima është një simptomë e refluksit acidik, një gjendje në të cilën acidi kthehet nga stomaku përsëri në ezofag dhe ndonjëherë në fyt, dhe nuk është aspak e këndshme.
Për fat të mirë, ju mund ta trajtoni refluksin acidik në mënyrë natyrale në shtëpi me mjaltë. Sipas studimit të botuar në gazetën indiane të kërkimeve mjekësore, mjalti mund të jetë i dobishëm për t’u përdorur kundër refluksit acidik për disa arsye.
Së pari, është i ngarkuar me antioksidantë që luftojnë dëmtimin e radikalëve të lira që mund të shkaktojnë dëme në qelizat në sistemin tuaj tretës.
Dëmtimi i qelizave në sistemin e tretjes mund të jetë një nga arsyet që shkakton refluksin acidik. Për më tepër, mjalti mbulon mukozën e ezofagut dhe gjithashtu lufton inflamacionin në ezofag, duke bërë që refluksi i acidit të jetë më pak i mundshëm.
Disa prova të tjera e mbështesin këtë. Rezultatet e një studimi të botuar në ‘British Medical Journal’ zbuluan se konsumimi i një luge çaji mjaltë të papërpunuar rezultoi në lehtësimin e simptomave të refluksit acidik.
Studiuesit sugjerojnë që forma e trashë dhe ngjitëse funksionon për të mbajtur acidin poshtë, transmeton Telegrafi.
Nëse kjo nuk ju pëlqen, mos u shqetësoni. Mund të përzieni një lugë çaji mjaltë me ujë të ngrohtë ose çaj kur shfaqen simptoma. Mjalti është përgjithësisht i sigurt për t’u konsumuar, por për shkak se përmban sheqer, bëni kujdes nëse keni diabet.
