Nënkryetarja e Kuvendit ka reaguar ndaj vrasjes së gruas në Kamenicë, e cila e dënoi krimin duke thënë se nuk ka asnjë tolerim, përcjell InLajmi.
Ajo tha se sa herë që kuptojmë për dhunën e ushtruar ndaj dikujt, kryesisht ndaj vajzave e grave, kërkojmë (me të drejtë) mbrojtje, reagim, drejtësi, barazi.
Nagavci tha se dhuna është pasojë e dështimit të edukimit, të institucioneve, të shoqërisë. Kemi dështuar të gjithë, kemi dështuar të mbrojmë personat në nevojë.
Postimi i saj i plotë:
Edhe një grua e vrarë!
Sa herë që ndodh një krim, reagojmë (me të drejtë) të gjithë.
Sa herë që kuptojmë për dhunën e ushtruar ndaj dikujt, kryesisht ndaj vajzave e grave, kërkojmë (me të drejtë) mbrojtje, reagim, drejtësi, barazi.
Dhuna e krimi janë të papranueshme e të dënueshme, nuk ka asnjë arsyetim, asnjë tolerim. Por, çdo rast i ri i dhunës është po ashtu një alarm, një këmbanë që na kujton dështimin e të gjithëve, inatin pse s’mundëm e s’bëmë më shumë.
Dhuna është pasojë e dështimit të edukimit, të institucioneve, të shoqërisë. Kemi dështuar të gjithë, kemi dështuar të mbrojmë personat në nevojë.
Kemi dështuar sepse kemi lejuar të na shkatërrojnë sistemin e arsimit, të drejtësisë e të sigurisë. Kemi lejuar të kemi institucione të kapura e cuba në pushtet, injorant në institucione e varfëri në shoqëri, varfëri në tryeza e në mendësi.
Kjo duhet të përfundojë. Reago paraprakisht, parandaloje dhunën. Dënoje dhunën. Ngrite zërin. Sot e për çdo ditë secili nga ne e çdo kund, ndaj secilit rast të dhunës, në familje, në institucione, në rrugë e në biznese.
Protesto ndaj dhunës private e strukturore./InLajmi/
