Lidhur me temën e pensionistëve kontributdhënës, në Kuvendin e Kosovës ka folur edhe deputeti i Aleancës së Ardhmërisë së Kosovës, Arbër Tolaj, duke shprehur shqetësimin e tij për fondin e grabitur pensional nga Serbia në vitin 1999, raporton InLajmi.
Tolaj ka thënë se kur ishte grabitur fondi pensional, numri i pensionistëve ishte mbi 89 mijë dhe se shumë prej tyre tashmë kanë vdekur.
Deputeti i AAK-së tha se pensionistëve shteti i Kosovës duhet t’u ndihmojë dhe jo t’i atakojë, siç bëri Serbia.
“Kur jemi tek kontributet pensionale, duhet theksuar se edhe shteti i Kosovës, domosdoshmërisht obligohet ti kryej detyrimet që i takojnë. Pensionistët tonë me dekada ishin pre e padrejtësive nga Sërbia, ndaj është e patolerushme që edhe më tutje të atakohen edhe nga ne. U bën vite që atyre nuk ju është rregulluar mjaftueshëm e drejta e tyre”, tha ai.
Tolaj tha se është jashtë çdo logjike që shqiptarëve të përjashtuar dhunshëm nga puna në vitet ’90 t’u kërkohet stazh pune prej 15 viteve.
Deputeti Tolaj tha se njohja e së drejtës së pensionistëve kontributdhënës duhet të përcaktohet deri në 10 vite, për shkak të rrethanave diskriminuese të kohës./InLajmi/
