Drejtori i Inspeksionit në komunën e Prishtinës, Adonis Tahiri, është deklaruar rreth zbatimit të masave të reja që janë ndërmarrë nga Qeveria e Kosovës, përcjell InLajmi.
Përmes një postimi në Facebook, Tahiri ka thënë se inspektorët do të jenë në krye të detyrës për mbikëqyrjen e zbatimit të masave të reja kundër Covid-19 që hyjnë në fuqi sonte.
Ai ka kërkuar respektim të masave derisa ka thënë se gjoba nuk është qëllim në vete, por po bëhet mjet i domosdoshëm.
“Sonte fillon zbatimi i masave të reja të Qeverisë. Inspektorët e Prishtinës do të jenë në krye të detyrës për mbikëqyrjen e zbatimit të këtyre masave. Gjoba nuk është qëllim në vete, por po bëhet mjet i domosdoshëm. Andaj, ju lutem, respektoni masat! Kujdesuni për veten dhe për të tjerët rreth jush!”, ka shkruar Tahiri./InLajmi/
