Zëvendëskryeministri Besnik Tahiri ka thënë se Qeveria aktuale është stabile dhe një ndryshim i përbërjes së saj nuk është përmendur.
“Nuk kemi folur dhe nuk flasim në raport me Qeverinë. Ajo që dihet është se ka një propozim-aktakuzë. Mund të ketë dhe të mos ketë aktakuzë, gjithçka që diskutohet është hipotetike. S‘ka të bëjë futjen e PDK-së në Qeveri…”, është shprehur Tahiri.
“Nëse ka aktakuzë, ka situatë të re që duhet ta shikojmë në tërësi”.
Tahiri në Info Magazine ka theksuar se Haradinaj nuk ka ambicie për të marrë pozita të larta shtetërore, qoftë ajo për presidentin.
“Haradinaj nuk e ka pranuar detyrën e deputetit dhe s’ka dashur pozicion në Qeveri. S’ka interesim që të flitet për poste. Ai i ka dalë zot secilës pozitë edhe kryeministër edhe shef i opozitës. Nuk ka diçka që mund të shtojë që në secilën situatë që vjen do të jemi të përgjegjshëm”, njofton Klan Kosova.
Për vizitën e sotme në Tiranë, Tahiri ka thënë se Kryeministri Hoti ka marrë mbështetjen për vazhdim të dialogut me Serbinë dhe njohjen reciproke sa më të shpejtë.
