Të shtunën në stadiumin ‘Riza Lushta’ në Mitrovicë është zhvilluar e ashtuquajtura finale ndërmjet KFF Mitrovicës dhe KFF Feronikelit
Takimin e kanë fituar vashat e skuadrës së Mitrovicës me rezultat minimal 1-0, duke u shpallur kështu kampione për sezonin 2019/2020 në konkurrencën e femrave në futboll.
Pas ndeshjes ka pasur akuza të ndryshme në mes të dy klubeve, ku Feronikeli ka akuzuar deputetin e PDK-së, Bekim Haxhiu për fyerje të renda ndaj tyre si dhe hyrje në zhveshtore.
Madje në një video të publikuar nga Klan Kosova shihet se deputeti kosovar ka pas edhe konfrontim fizik në stadium.
Sipas informatave të para të ardhura në redaksinë e Gazetës inFokus, Ragip Veseli ishte personi që u godit nga Haxhiu, por një lajm të tillë e ka mohuar vet deputeti nga radhët e PDK-së.
Haxhiu për kallxo.com ka deklaruar se nuk ka goditur askënd, por vetëm e ka nda djalin e vëllait të tij që të mos përleshet me ekipin kundërshtare.
“Ai është djali i vllaut tim që nuk e kam lënë me u përlesh me tjerët, që i kam nda se nuk kam shpërnda asnjë shuplakë, por vetëm i kam ndarë mos me pasë përleshje, shkruan Gazeta inFokus.
Ai është djali i vllaut tim për mos me ra në provokime me shpifësin Ragip Veselin. Ai është djali i vllaut tem që s’e kam lënë me bo probleme në stadium. Nuk është shuplakë, po e kam tërhek për qafe edhe e kam shtyrë për mos me pasë problem”, ka thënë Bekim Haxhi.
Ndryshe, kryetar i KFF Mitrovicës është vëllai i Bekim Haxhiut, Hajrullah Haxhiu.
