Ministri i Shëndetësisë Armend Zemaj vizitoi sot Komunën e Istogut ku u prit nga kryetari i kësaj komune Haki Rugova, përcjell InLajmi.
Gjatë kësaj vizite, Ministri Zemaj me kryetarin Rugova kanë biseduar për menaxhimin e pandemisë Covid-19 në këtë komunë, me ç’rast Ministri Zemaj ka falënderuar autoritetet lokale dhe profesionistët shëndetësor të kësaj komune për përkushtimin e treguar gjatë kësaj kohe.
Ai ka thënë se MSH është duke fuqizuar aktivitetet e saj si në aspektin e shtimit të kuadrit mjekësor, ashtu edhe të masave mbikëqyrëse për zbatimin e Manualit për mbrojtje nga përhapja e Covid-19, të miratuar nga Ministria.
Ministri Zemaj tha se MSH do të jetë afër komunave duke siguruar mbështetje për Kujdesin Parësor Shëndetësor, duke e ditur rëndësinë e këtij niveli që është porta e parë e luftimit të sëmundjeve.
Ai kërkoi që institucionet dhe qytetarët e Komunës së Istogut ta zbatojnë manualin dhe masat në fuqi në funksion të ruajtjes së shëndetit publik.
Kryetari i Istogut, z. Haki Rugova ka falënderuar ministrin për vizitën dhe bashkëpunim dhe e ka njoftuar atë me nevojat e Kujdesit Parësor Shëndetësor në këtë komunë.
Ai ka thënë se qendra operative e emergjencës në këtë komunë ka menaxhuar në bashkëpunim me institucionet qendrore situatën rreth Covid-19 në këtë komunë./InLajmi/
