Kryeministrja e Danimarkës, Mette Frederiksen ka shtyrë dasmën e saj për të marrë pjesë në mbledhjen e Këshillit Evropian muajin tjetër, tha ajo në një postim në Instagram të enjten.
Sipas CNN, udhëheqësit e BE-së kanë planifikuar të takohen ballë për ballë më 17 korrik për herë të parë që nga shpërthimi i pandemisë së coronavirusit për të diskutuar buxhetin evropian dhe planet për rikuperimin nga kriza e COVID-19.
“Mezi po pres të martohem me këtë burrë”, shkruajti Frederiksen në një postim ku shfaqet vetë dhe i fejuari i saj Bo Tengberg.
“Takimi i Këshillit në Bruksel është caktuar pikërisht të shtunën në Korrik kur ne kishim planifikuar dasmën… Por, unë duhet të bëj punën time dhe të mbroj interesat e Danimarkës”.
“Mezi po pres t’i them ‘Po’ Bo (i cili fatmirësisht është shumë i durueshëm)”, shtoi ajo.
Danimarka ka regjistruar 12,836 raste të koronavirusit dhe 603 vdekje, sipas shifrave të Universitetit Johns Hopkins, përcjell Telegrafi.
Bëhet fjalë për një nga vendet e para perëndimore që filloi të lehtësojë kufizimet e bllokimit në prill pasi numri i rasteve në vend mbeti i ulët.
