Ambasada amerikane në Kosovë ka bërë të ditur se i emëruari i posaçëm i Shtëpisë së Bardhë për dialogun ndërmjet Kosovës dhe Serbisë, Richard Grenell ka deklaruar se takimi i 27 qershorit është një mundësi e mirë për zhvillime dhe investime ekonomike, përcjell InLajmi.
Sipas një njoftimi të ambasadës, Grenell citohet të ketë thënë se SHBA-të shpresojnë që liderët e të dyja vendeve do ta shfrytëzojnë këtë mundësi për të iu rikthyer dialogut.
Njoftimi i plotë i Ambasadës amerikane në Kosovë :
I dërguari i posaçëm presidencial për negociatat e paqes në mes Kosovës dhe Serbisë, Richard Grenell sot dha këtë deklaratë në lidhje me takimin e ardhshëm në Washington me përfaqësuesit nga Kosova dhe Serbia:
“Kjo mundësi e Shtëpisë së Bardhë hap derën e zhvillimit të ri ekonomik dhe investimeve. SHBA-ja shpreson që liderët e Kosovës por edhe Serbisë do të shfrytëzojnë këtë mundësi për t’u rikthyer në dialog dhe për të filluar një epokë të re të prosperitetit dhe stabilitetit. Qytetarët e këtij rajoni meritojnë asgjë më pakë”. /InLajmi/
