Kryetari i Lëvizjes Vetëvendosje, Albin Kurti, ka kërkuar që dialogu mes Kosovës dhe Serbisë të zhvillohet në mënyrë transparente, larg nga marrëveshjet sekrete për shkëmbim territorial, përcjell InLajmi.
Këto deklarata i bëri gjatë takimit me përfaqësuesin e BE-së për dialogun Kosovë-Serbi, Miroslav Lajçak.
“Dialogu duhet të udhëhiqet nga përfaqësues legal dhe legjitim e jo nga këta që kanë kontrabanduar pushtetin duke rrëzuar qeverinë e mirë dhe demokratike të zgjedhur nga populli”, ka thënë Kurti.
Ndërsa, në fund të dyja palët u dakorduan që të vazhdojnë komunikimin e rregullt në mënyrë që të informojnë njëri tjetrin për zhvillimet në skenën politike
Postimi i plotë i Lëvizjes Vetëvendosje:
Sot, Kryetari i Lëvizjes VETËVENDOSJE!, Albin Kurti së bashku me nënkryetarin Besnik Bislimi, deputeten dhe anëtaren e kryesisë Fitore Pacolli Dalipi dhe anëtarin e kryesisë Glauk Konjufca, takoi Përfaqësuesin e Posaçëm të Bashkimit Evropian për Dialogun Beograd-Prishtinë dhe çështje të tjera rajonale të Ballkanit Perëndimor, z. Mirosllav Lajçak, shefen e zyrës së BE-së znj. Natalia Apostolova, znj. Anna Maria Boura, kryesuese e COWEB, znj. Katharina Kandt, këshilltare e z. Lajçak dhe Umerr Al – Khatib, këshilltar politik në zyrën e BE-së.
Përfaqësuesi i Posaçëm i Bashkimit Evropian për Dialogun Beograd-Prishtinë z. Lajçak gjatë takimit theksoi interesimin e Brukselit për dialog me parime e marrëveshje për normalizim midis dy vendeve. Por, z. Lajçak u shpreh se nuk mund të ketë marrëveshje të suksesshme pa përfshirjen e Kryetarit Albin Kurti dhe Lëvizjen VETËVENDOSJE!, kjo duke marrë parasysh përkrahjen gjithnjë në rritje dhe ndikimin e madh brenda vendit. Ai njoftoi që Brukseli po punon për rifillimin e dialogut i cili pritet të nis në muajin që vjen.
Ndërsa, Kurti nënvizoi se dialogu mes Kosovës dhe Serbisë është i nevojshëm. Dialogu duhet të zhvillohet në mënyrë transparente, larg nga marrëveshjet sekrete për shkëmbim territorial dhe me ndërmjetësim të Bashkimit Evropian dhe të Shteteve të Bashkuara të Amerikës. Dialogu duhet të udhëhiqet nga përfaqësues legal dhe legjitim e jo nga këta që kanë kontrabanduar pushtetin duke rrëzuar qeverinë e mirë dhe demokratike të zgjedhur nga populli. Prandaj, zgjedhjet janë të domosdoshme dhe të pashmagmshme për një qeveri legjitime e kredibile të dialogoj dhe të arrij një marrëveshje të qëndrueshme e afatgjate.
Në fund, të dyja palët u dakorduan që të vazhdojnë komunikimin e rregullt dhe të sinqertë në mënyrë që të informojnë njëri tjetrin për zhvillimet e mundshme në skenën politike. /InLajmi/
