Radhë të gjata janë krijuar te Qendra e Regjistrimit Civil të Kosovës, kështu duke u rrezikuar edhe shëndeti i qytetarëve pasi nuk respektohet distanca.
Instituti Kombëtar i Shëndetësisë Publike të Kosovës (IKSHPK), në vazhdimësi është duke i bërë thirrje qytetarëve që të mbajnë maskë, distancë dhe higjienë mirëpo, një gjë të tillë nuk po e respektojnë qytetarët.
Në Qendrën e Regjistrimit Civil gjatë ditës së sotme radha e pritjes ka qenë mjaftë e gjatë dhe pa distancë e madje disa qytetarë as nuk kanë vendosur maska.
Kjo gjë vërtetohet në fotografitë që lexuesit kanë dërguar.
Pavarësisht se brenda objektit të Qendrës së Regjistrimit Civil asnjë qytetarë nuk lejohet të hyjë po që se nuk ka maskë, gjatë pritjes para objektit të kësaj Qendre qytetarët nuk po kujdesen për shëndetin e tyre, shkruan Lajmi.net
Theksojmë se deri më tani në Kosovë janë evidentuar 1 mijë e 615 raste me koronavirus, ku 34 prej tyre kanë ndërruar jetë dhe 963 kanë arritur që të shërohen, përderisa vetëm gjatë së hënës janë regjistruar 129 raste të reja.
