Më rastin e shënimit të 21-vjetorit, Ditës së Çlirimit të Komunës së Drenasit, është mbajtur Seanca Solemne e Kuvendit të Komunës dhe janë bërë homazhe ne të gjitha varrezat e dëshmorëve, përcjell InLajmi.
Fillimisht në Sallën e Kulturës, është mbajtur Seanca Solemne, ku merrnin pjesë nënkryetari i Komunës, Nazmi Hasi, kryesuesi i Kuvendit, Labinot Halilaj, anëtar të Kuvendit dhe drejtor të drejtorive komunale. Seanca është udhëhequr nga kryesuesi Halilaj, i cili tha se, 14 Qershori është një datë historike, ditë e cila na kujton shpresën për jetë e liri të kërkuar me shekuj.
Ndërsa, nënkryetari Hasi, në fjalimin e tij tha se Dita e Çlirimit, është data ku me nderim të thellë, kujtojmë gjithë sakrificën e jashtëzakonshme të qytetarëve të Drenasit, heronj, dëshmorët dhe martirët e lirisë.
“Sot kujtojmë heroizmin e familjes Jashari, luftën e shenjt çlirimtare të Komandantit Legjendar Adem Jashari e bashkëluftëtarëve të tij, kujtojmë masakrat mbi civilët në Qirez e Likoshan, Abri, Izbicë, Rezallë, Reçak, Studime, Dubravë, Krushë e Madhe, Has e masakra të tjera mbi popullin e pafajshëm e liridashës shqiptar”, ka thënë mes tjerash nënkryetari Hasi ki ka shtuar se Drenasi ishte në luftë zonë e përfshirjes masive për liri dhe çlirim.
Pas përfundimit të Seancës Solemne, nënkryetari Hasi, kryesuesi i Kuvendit, Labinot Halilaj, anëtar të Kuvendit dhe drejtor të drejtorive komunale, kanë bërë homazhe e kanë vendosur buqeta me lule të freskëta në sheshin “Fehmi Lladrovci” pran shtatoreve të Heronjve./InLajmi/
