Përfaqësuesja e Kosovës në basketboll do të grumbullohet në pjesën e dytë të muajit gusht. Përgatitjet do të udhëhiqen nga përzgjedhësi i Kosovës, Christos Marmarinos, i cili do të shohë nga afër formën e basketbollistëve, përcjell InLajmi.
Drejtori i Përfaqësueseve të Kosovës, Granit Rugova ka dhënë më shumë detaje për këtë grumbullim.
“Grumbullimi është shumë i nevojshëm, sidomos për lojtarët që të jenë sa më shumë aktiv, në këtë kohë kur janë pezulluar aktivitetet sportive për shkak të pandemisë Covid-19”, ka thënë ai.
“Ne kemi filluar kampanjën për Botërorin 2023 me dy fitore dhe shpresojmë se, do të vazhdojmë me rezultate pozitive edhe në muajin nëntor dhe në shkurt të vitit të ardhshëm, kur do të kemi dy ndeshjet e fundit para-kualifikuese”, është shprehur Rugova për faqen zyrtare të FBK-së.
Grumbullimi do të mbahet nëse situata me pandeminë Covid-19 do të përmirësohet në Kosovë. Kosova në para-kualifikimet evropiane për Botërorin 2023, ka mundur në shtëpi Islandën 80:78 dhe Luksemburgun në udhëtim 80:84. /InLajmi/
