Interi thuhet se tashmë ka dërguar një ofertë zyrtare drejt klubit të Hellas Veronës për mbrojtësin shqiptar, Marash Kumbulla.
Kumbulla vazhdon të jetë njër nga futbollistët shqiptar më të kërkuar në tregun e transferimeve, me skuadrat e mëdha europiane që kanë shprehur interesim për të.
Interi thuhet se është klubi që prin në garë për transferimin e tij dhe tashmë kanë bërë ofertën e parë zyrtare.
Panorama Sport’ ka mësuar se Marotta dhe bashkëpunëtorët e tij ‘zikaltër’ kanë arritur të jenë në avantazh sa i përket kësaj tratative duke bërë ofertën zyrtare prej 25 milionë eurosh dhe kartonin e sulmuesit Edi Salsedo. Ky i fundit është një futbollist në pronësi të ‘zikaltërve’ dhe që ka luajtur në formë huazimi te veronezët.
Të njëjtat burime bëjnë me dije për gazetën se Kumbulla në ambientin zikaltër është një goditje që projektohet për të zëvendësuar Milan Skriniarin. Qendërmbrojtësi i zikaltërve me gjasë mund të transferohet në një tjetër kampionat dhe Manchester City është vetëm një prej ekipeve të mëdha që mund të ofrojnë shifrën prej të paktën 80 milionë eurosh për dëshirat e ‘zikaltërve’.
Marash Kumbulla vazhdon të jetë në radarin të skuadrave nga Premier Liga, si Chelsea, Manchester United, Everton e Tottenham Hotspur. Gjithashtu, për të interesim kanë shprehur edhe Interi, Napoli, Fiorentina e Lazio.
Për reprezentuesin shqiptar interesim kanë shprehur edhe skuadrat gjermane, Borussia Dortmund, Schalke 04 dhe Eintracht Frankfurt.
