Xhamia e Madhe ose Qëndrore në Prishtinë, është një ndër çështjet që ka qenë në diskutim për shumë kohë. Ku duhet të ndërtohet, ka qenë një temë mjaftë e diskutuar që e ka përcjell që nga fillimi këtë process ende të pa finalizuar.
Në Ditën e Fitër Bajramit, kryetari i Prishtinës Shpend Ahmeti, kishte dhënë lajmin se Bashkësia Islame në Kosovë, kishte dorëzuar lejen në komunë për të filluar ndërtimi i saj.
E tani kur kanë kaluar 11 ditë që nga ajo deklaratë, i kontaktuar nga IndeksOnline, Ahmeti ka bërë me dije se aktualisht aplikimi i BIK-ut për ndërtimin e Xhamisë së Madhe është duke u shqyrtuar brenda Drejtorisë së Urbanizmit.
Procesi sipas tij është në rrjedhat normale administrative, siç i ndodh çdo projekti, ndonëse kësaj radhe kemi të bëjmë me një projekt më të madh.
“BIK ka aplikuar, ndërsa tani është duke u shqyrtuar brenda Drejtorisë së Urbanizimit. Ky nuk është projekt i vogël, por po shqyrtohet brenda afateve. Në momentin kur janë gati pastaj ju lajmërojmë”, tha Ahmeti për IndeksOnline.
Sipas Ahmetit tani janë duke u diskutuar disa detaje e që lidhen me kushtet e ndërtimit, ashtu siç bëhet në çdo rast kur jepen leje.
“Pritet të finalizohet shpejtë, nuk ka ndonjë problem vetëm se janë disa detaje të cilat duhet mu definu sipas planit rregullativ në fuqi dhe sipas ligjeve”, theksoi Ahmeti.
Ndryshe kërkesa për një xhami të përmasave të tilla e cila pritet të ndërtohet pranë Postës së Madhe në Prishtinë, ka qenë e kamotshme.
