Ka përfunduar takimi i kryeministrit Avdullah Hoti dhe ministrit të Shëndetësisë, Armend Zemaj, ku më pas ata kanë mbajtur një konferncë për media, duke diskutuar për situatën e krijuar nga pandemia me koronavirus, raporton InLajmi.
Hoti para mediave tha se në këtë takim është informuar për sfidat që e presin Qeverinë e re në përballje me këtë gjendje.
Ai tha se Qeveria që udhëheq ai, ka një plan afatgjatë në këtë drejtim.
“U informuam për gjërat që na presin në javën e ardhshme. Po lutemi që ta kalojmë sa më lehtë dhe po duket që jemi duke e kaluar lehtë. Kërkova nga ministri që të mbajmë lartë vetëdijën për mbrojtjen nga virusi. Ne kemi një plan bukur të zhvilluar për përballje afatgjate me këtë pandemi, e cila mundëson hapjen graduale të sektorëve dhe të njëjtën kohë të parandalohet përhapja e pandemisë” tha ai për media.
Hoti po ashtu bëri të ditur se në ditët në vijim pritet edhe miratimi i një plani afatgjatë për pandeminë e koronavirusit./InLajmi/
