Në Ditën ndërkombëtare të Fëmijëve, kryetarja e Kuvendit të Kosovës, Vjosa Osmani, kujton fëmijët e vrarë nga forcat serbe, ku thotë se thirrja e 1133 fëmijëve duhet të kumbojë çdo ditë në veshët tanë, që shtetin ta bëjmë strehë të sigurt dhe vend në të cilin fëmijët e Kosovës do ta ndërtojmë të ardhmen e tyre, shkruan InLajmi.
Osmani në rrejtin social facebook ka thënë se Gjatë luftës së fundit në Kosovë, 1133 fëmijëve, disa prej tyre foshnje disa-javësh, iu pre jeta ende pa e nisur mirë dhe 109 fëmijë sot e kësaj dite rezultojnë ende të zhdukur.
“Ne nuk mund ta shfletojmë faqen e së nesërmes nëse nuk sigurohemi se e kemi lexuar vëmendshëm dhe e kemi mbajtur në mend mësimin e së djeshmes. Liria nuk do të ketë kuptim pa drejtësi për njëmijë e njëqind e tridhjetë e tre fëmijët që i morën nga ne”, ka shkruar Osmani në Facebook.
Thirrje për drejtësi në ditën ndërkombëtare të fëmijëve
Gjatë luftës së fundit, 1133 fëmijëve, disa prej tyre foshnje disajavëshe, iu pre jeta ende pa e nisur mirë. ‘Faji’ i vetëm i tyre qe ëndrra e tyre, bota e tyre e çiltër dhe shpresa për ta jetuar jetën në një botë të lirë. E, ata kishin lindur në një vend në të cilin liria ishte e kërcënuar dhe përkatësia etnike e familjare trajtohej si argument i mjaftueshëm për t’i ndarë ata nga jeta. 109 fëmijë sot e kësaj dite rezultojnë ende të zhdukur.
Fëmijët e vrarë në Kosovë, më shumë se në çdo luftë tjetër në hapësirat e ish-Jugosllavisë, po të krahasohen me numrin e përgjithshëm të viktimave, janë thirrja e vazhdueshme e ndërgjegjes për mizorinë ndaj qenieve më të pafajshme në botë, fëmijëve.
Secili emër i tyre, të cilin ne e sollëm në kujtesë sot në ditën ndërkombëtare të fëmijëve, na e rrëfen një histori më vete, e të gjithë së bashku jehojnë si thirrje e përhershme për ta kujtuar të kaluarën, ëndrrën e këputur, nga e cila, megjithatë, lindi dhe po rritet Republika jonë.
Por, nëse Republika po lëshon shtat, nëse pavarësia e Kosovës është mbërritur, bashkë me moshën e republikës po rritet edhe distanca me përjetimin, me historinë tone, gjurmët e së cilës mund të treten një ditë. Prandaj, bashkë me shtatin e Republikës, duhet të rritet edhe vetëdija për themelet e saj, për dhimbjen e përhershme mbi të cilën lindi ajo. Thirrja e 1133 fëmijëve duhet të kumbojë çdo ditë në veshët tanë, që shtetin ta bëjmë strehë të sigurt dhe vend në të cilin fëmijët e Kosovës do ta ndërtojmë të ardhmen e tyre.
Ne nuk mund ta shfletojmë faqen e së nesërmes nëse nuk sigurohemi se e kemi lexuar vëmendshëm dhe e kemi mbajtur në mend mësimin e së djeshmes.
Liria nuk do të ketë kuptim pa drejtësi për njëmijë e njëqind e tridhjet e tre fëmijët që i morën nga ne./InLajmi/
Sot, në Ditën Ndërkombëtare të Fëmijëve, e mbarë bota i kthen sytë dhe vëmendjen kah ata që na ofrojnë jo vetëm dashuri të përhershme, por edhe pikëvështrimin më të çiltër për botën. Në anën tjetër, kjo ditë shërben edhe si ditë reflektimi e thirrjeje të ndërgjegjes për shkeljet e shumta e të vazhdueshme ndaj lirive dhe të drejtave të tyre. Prandaj, në këtë ditë të veçantë për ta, ne duam që vëmendjen tonë ta kthejmë nga mbrojtja dhe promovimi i të drejtave dhe i lirive të tyre jo vetëm sot por çdo ditë, si dhe të bëjmë thirrje edhe një herë që vullneti i tyre për ta parë një botë më të mirë të na shërbejë si orientim për sjelljen tonë. Çiltërsia e tyre, kreativiteti me të cilin ata e shohin përçdoditshëm jetën, duhet të na shërbejë si udhërrëfyes për ta krijuar vizionin tonë për botën.Fatkeqësisht, për shkak të pandemisë globale me virusin Covid-19, ne në Kuvendin e Kosovës sivjet këtë ditë po e shënojmë pa praninë e fëmijëve në sallën tonë plenare dhe pa kënaqësinë që ata na e japin kur në shtëpinë e përfaqësuesve të popullit i shpalosin lirshëm idetë e tyre kreative mbi jetën e shoqërinë dhe kur, pa ngurrim, na i rikujtojnë përgjegjësitë që ne të rriturit i kemi ndaj tyre. Por, kjo nuk na ndalon që të mendojmë sot dhe çdo ditë tjetër për promovimin e të drejtave dhe të lirive të tyre.P.S. Video nga shkurti i këtij viti.
Posted by Vjosa R. Osmani on Monday, June 1, 2020