Shefi i Grupit Parlamentar të Vetëvendosjes Rexhep Selimi është deklaruar se për Lëvizjen nuk do të jetë i pranueshëm ndonjë afat që do të vendos Gjykata Kushtetuese, përcjell InLajmi.
Ai ka thënë se gjyqtarët e Kushtetueses janë njerëz që janë zgjedhur nga Kuvendi dhe mund të gabojnë.
Ai thotë se s’ka si të pranohet një vendim i padrejtë.
“Disa herë është bërë me të drejtë kjo pyetje. Dhe përgjigjja s’ka si të jetë e ndryshme. Nëse vendimi i Kushtetueses mund të merrej jo në përputhje me Kushtetutën atëherë s’ka si të jetë i pranueshëm”.
Selimi thotë se kanë besuar se Kushtetuesja do të merr vendim të drejtë prandaj i janë drejtuar.
“Nuk duhet t’i shenjtërojmë anëtarët e Gjykatës Kushtetuese. Ata janë njerëz dhe ne besojmë se do të marrin vendim të drejtë”.
Selimi në RTV Dukagjini ka thënë se Gjykata Kushtetuese vetëm interpreton Kushtetutën dhe nuk bënë ndonjë amandamentim të Kushtetutës.
“Nëse Kushtetuesja vendos ndonjë afat që nuk është i përshkruar në Kushtetutë ne do të kërkojmë ku është i shënuar ai në Kushtetutë”, tha ndër të tjera Rexhep Selimi./InLajmi/
